Surat Mosquito Control: ગુજરાતમાં પ્રથમ વખત ડ્રોનથી મચ્છર નિયંત્રણ: સુરત મહાનગરપાલિકાની નવી ટેકનોલોજી
Surat Mosquito Control: ગુજરાતમાં મચ્છરજન્ય રોગચાળાના નિયંત્રણ માટે પહેલીવાર ડ્રોન ટેકનોલોજીનો ઉપયોગ કરવામાં આવ્યો છે. સુરત મહાનગરપાલિકાએ જંતુનાશકોના છંટકાવ માટે AI-ML આધારિત ડ્રોનનો ઉપયોગ શરૂ કર્યો છે.
મચ્છર નિયંત્રણ માટે સુરત મ્યુનિસિપલ કોર્પોરેશનનો નવીન પ્રયાસ
સુરત શહેરમાં છેલ્લા એક મહિનાથી મચ્છર ઉપદ્રવની ફરિયાદો વધી રહી હતી. આ સમસ્યાને ધ્યાનમાં લઈને, સુરત મહાનગરપાલિકાએ એક અનોખી પહેલ કરી છે. રાંદેર ઝોનના ભેંસાણ વિસ્તારમાં સફાઈ સ્ટાફ પહોંચી શકતા નહીં હોય તેવા વિસ્તારોમાં ડ્રોન દ્વારા જંતુનાશક દવાનો છંટકાવ કરવામાં આવ્યો. AI-ML ટેકનોલોજી આધારિત આ ડ્રોન સઘન દેખરેખ સાથે અસરકારક રીતે મચ્છરોના નિયંત્રણ માટે કાર્યરત છે.
મેયરની મહત્વની જાહેરાત
સુરત મહાનગરપાલિકાના મેયર દક્ષેશભાઈ માવાણીએ જણાવ્યું કે, શહેરમાં મચ્છરજન્ય રોગચાળો અટકાવવા માટે હવે ડ્રોન ટેકનોલોજીનો ઉપયોગ કરવામાં આવશે. જ્યાં સફાઈ કર્મચારીઓ પહોંચી શકતા નથી, ત્યાં દેખરેખ અને દવા છંટકાવ માટે ડ્રોનનો ઉપયોગ કરાશે.
આ ટેકનોલોજીનો લાભ ખાસ કરીને ચોમાસા દરમિયાન લેવામાં આવશે, જ્યારે શહેરના વિવિધ વિસ્તારોમાં પાણી ભરાતા મચ્છરજન્ય રોગચાળાની તીવ્રતા વધી જાય છે. મેયરે વધુમાં જણાવ્યું કે, “7 થી 10 દિવસમાં મચ્છરના લાર્વાને નાશ ન કરવામાં આવે તો મેલેરિયા, ડેન્ગ્યુ અને ફાઇલેરિયાસિસ જેવા રોગો ફેલાઈ શકે છે. તેથી, મહાનગરપાલિકા ડ્રોન ટેકનોલોજીનો વધુ ઉપયોગ કરી મચ્છર નિયંત્રણ માટે કાર્યરત રહેશે.”
સુરત મહાનગરપાલિકાની આ પહેલ ગુજરાતમાં મચ્છર નિયંત્રણ માટે ઉપયોગમાં લેવાતી પ્રથમ AI-ML આધારિત ટેકનોલોજી છે.
