Government Scheme: ગુજરાતના ખેડૂતો માટે નવી સુવિધા: હવામાન અને જીવાત ઉપદ્રવની જાણકારી હવે મોબાઈલ પર
Government Scheme: ગુજરાત વિધાનસભા ગૃહમાં કૃષિ પ્રધાન રાઘવજી પટેલે જણાવ્યું હતું કે મુખ્ય પ્રધાન ભૂપેન્દ્ર પટેલના માર્ગદર્શન હેઠળ ગુજરાત સરકારે ખેડૂતો માટે સ્માર્ટફોન ખરીદી સહાય યોજના શરૂ કરી છે. આ યોજના હેઠળ, રાજ્યના ખેડૂતોને સ્માર્ટફોન ખરીદી માટે મહત્તમ 6000 રૂપિયાની સહાય આપવામાં આવે છે, જે ખરીદીની કિંમતના 40% અથવા 6000 રૂપિયાથી ઓછું હોય તેટલી રકમ હોઈ શકે છે.
છેલ્લા બે વર્ષમાં, ખેડા જિલ્લાના 2,246 ખેડૂત લાભાર્થીઓને આ યોજના અંતર્ગત કુલ 100 લાખથી વધુની સહાય આપવામાં આવી છે. આ યોજનાનો ઉદ્દેશ્ય ખેડૂતોને હવામાનની આગાહી, સંભવિત રોગ-જીવાત ઉપદ્રવ અને તેની નિયંત્રણ પદ્ધતિઓ, નવીનતમ ખેતી પદ્ધતિઓ, તેમજ સરકારની કૃષિ સંબંધિત યોજનાઓની માહિતી તેમના સ્માર્ટફોન દ્વારા સરળતાથી પ્રાપ્ત કરાવવા માટે કરવામાં આવ્યો છે.
રાઘવજી પટેલે જણાવ્યું હતું કે, ભવિષ્યમાં ગુજરાતના ખેડૂતો મોબાઇલ એપ્લિકેશન પર નોંધણી કરીને પોતાના ખેતરને જીઓ-રેફરેન્સિંગ દ્વારા માર્ક કરી શકશે. સેટેલાઇટ ઈમેજ પ્રોસેસિંગની મદદથી, તેઓ પાકના આરોગ્યની સંપૂર્ણ વિગતો સીઝન દરમિયાન મેળવી શકશે. આ મોબાઇલ એપ્લિકેશન ખેડૂતને વાવણીથી લઈને કાપણી સુધીની ખેતી પદ્ધતિઓ માટે માર્ગદર્શન આપશે, જેથી તેઓ યોગ્ય ખેતી કાર્યોની અમલવારી કરી શકે.
આ યોજનાનો લાભ રાજ્યમાં જમીન ધરાવતા તમામ ખેડૂતોને મળી શકે છે. સંયુક્ત ખાતાના કિસ્સામાં, 8-અ નાં રેકોર્ડમાં દર્શાવેલા પૈકી એક જ ખાતેદારને લાભ મળશે. આ યોજના હેઠળ સહાય મેળવવા માટે ખેડૂતોને i-ખેડૂત પોર્ટલ પર ઓનલાઈન અરજી કરવાની અને જરૂરી દસ્તાવેજો અપલોડ કરવાની જરૂર રહેશે.
