Deesa firecracker factory blast: ડીસા ફટાકડા વિસ્ફોટ કેસમાં નવો ખુલાસો: ઇન્દોરનો મુખ્ય કોન્ટ્રાક્ટર હરીશ મેઘવાની ઝડપાયો; મજૂરો મોકલીને લેતો હતો નફો
Deesa firecracker factory blast: ડીસામાં ફટાકડા ગોડાઉનમાં થયેલા વિસ્ફોટના કેસમાં હવે વધુ એક મહત્વપૂર્ણ આરોપીની ધરપકડ કરવામાં આવી છે. બનાસકાંઠા જિલ્લાના ડીસા વિસ્તારમાં આવેલી ગેરકાયદેસર ફટાકડા ફેક્ટરીમાં થયેલા વિસ્ફોટમાં 22 લોકોના દુર્ભાગ્યપૂર્ણ મોત થયા હતા. હવે ઇન્દોરનો મુખ્ય કોન્ટ્રાક્ટર હરીશ રામચંદ્ર મેઘવાનીને પોલીસે ઝડપી લીધો છે.
અગાઉ પિતા-પુત્ર ઝડપાઈ ચુક્યા છે
આ ઘટનામાં અગાઉ ફેક્ટરીના માલિક ખૂબચંદ રેણુમલ મોહનાની અને તેના પુત્ર દીપક ખૂબચંદ મોહનાનીની ધરપકડ થઇ ચૂકી છે. બંને આરોપીઓ હાલમાં આઠ દિવસના પોલીસ રિમાન્ડ પર છે અને તેમની પૂછપરછ ચાલી રહી છે.
વિશેષ તપાસ ટીમની રચના અને સફળતા
આ કેસની ગંભીરતાને ધ્યાનમાં રાખીને બોર્ડર રેન્જ ભુજના IG ચિરાગ કોરડિયા તથા બનાસકાંઠા SP અક્ષયરાજ મકવાણાના માર્ગદર્શન હેઠળ વિશેષ તપાસ ટીમ બનાવી દેવાઈ હતી. ડીસાના ડીવાયએસપી સી.એલ. સોલંકીની આગેવાની હેઠળ એલસીએબી, એસઓજી અને પેરોલ ફર્લો સ્કવોડ સહિતની વિવિધ ટીમોએ દેશના અલગ-અલગ રાજ્યોમાં તપાસ શરૂ કરી હતી. તપાસ દરમિયાન ઇન્દોરમાં આરોપી હરીશ મેઘવાનીના ઠેકાણાની માહિતી મળી આવતાં તેને ઝડપી લેવાયો છે.
જાણો કોણ છે હરીશ મેઘવાની?
આરોપી હરીશ મેઘવાની ઇન્દોરના ટ્રેઝર ટાઉન સોસાયટી, બજિલપુરનો નિવાસી છે. પોલીસ તપાસમાં ખુલ્યું છે કે હરીશ અને ફેક્ટરીના માલિક ખૂબચંદ-દીપક એક જ સમાજના હોવાને કારણે લાંબા સમયથી એકબીજાને ઓળખતા હતા. આરોપી હરીશે કોન્ટ્રાક્ટર લક્ષ્મી અને પંકજ સાથે મળીને પહેલા સ્થળની મુલાકાત લીધી હતી અને સૂતળી બોમ્બ બનાવવા માટે તે ગોડાઉન યોગ્ય હોવાનું નિર્ધારિત કર્યું હતું. ત્યારબાદ તે હરદા જિલ્લાથી મજૂરો લાવીને ડીસામાં ફેક્ટરીમાં મોકલતો હતો અને આ પ્રક્રિયામાંથી પોતે નાણાકીય ફાયદો મેળવતો હતો.
કેવી રીતે ઘટી હતી વિસ્ફોટની ઘટના?
મંગળવાર, 1 એપ્રિલના રોજ ડીસાના ઢુંવા રોડ પર આવેલી દીપક ટ્રેડર્સ નામની ફેક્ટરીમાં ભારે વિસ્ફોટ થયો હતો. દારૂગોળાની હાજરીને કારણે આગ ભડકી અને સમગ્ર ફેક્ટરી ધ્વસ્ત થઇ ગઈ. વિસ્ફોટ એટલો ભયંકર હતો કે 200 મીટરની આસપાસનો વિસ્તાર કાટમાળથી ઢંકાઈ ગયો હતો અને કેટલાક મજૂરોના શરીરના ભાગો પણ દૂર સુધી ફેંકાઈ ગયા હતા.
આ કેસ સાથે સંબંધિત દરેક ગુનાહિત કડી ધીમે ધીમે બહાર આવી રહી છે અને પોલીસ તપાસ ઝડપથી આગળ વધી રહી છે. આગામી દિવસોમાં વધુ ખુલાસા થવાની શક્યતા છે.
