COVID-19 csaes in Ahmedabad: ગુજરાતમાં ફરી કોરોના સંકટ: અમદાવાદમાં 60, રાજકોટમાં 8 નવા કેસ, હિમકરસિંહ પોઝિટિવ
COVID-19 csaes in Ahmedabad: તાજેતરમાં ગુજરાત રાજ્યમાં કોરોનાના કેસો ફરીથી આવ્યા છે. ખાસ કરીને અમદાવાદ, રાજકોટ અને સુરત જેવા શહેરોમાં સંક્રમણની નોંધપાત્ર વૃદ્ધિ જોવા મળી રહી છે. તાજેતરમાં નોંધાયેલા આંકડા એ સ્પષ્ટ સંકેત આપે છે કે કોવિડ-19નું જોખમ હજી પૂરેપૂરું ટળ્યું નથી.
અમદાવાદમાં એક જ દિવસે 60 નવા કેસ
અમદાવાદ શહેરમાં 3 જૂનના રોજ એક જ દિવસમાં કોરોનાના 60 નવા કેસ નોંધાતા તંત્રને ચિંતા વધારવી પડી છે. શહેરમાં હાલ કુલ 330 કેસ નોંધાયા છે જેમાંથી 241 એક્ટિવ છે. શહેરના પશ્ચિમ વિસ્તારમાં — જેમ કે બોપલ, ઘુમા, ચાંદખેડા, સાબરમતી, નવાવાડજ, વસ્ત્રાપુર અને સરખેજ જેવા વિસ્તારોમાં — કોરોનાના કેસો વધુ જોવા મળ્યા છે. આ વિસ્તારોમાં લગભગ 190થી વધુ કેસ નોંધાતા સ્થાનિક સ્વાસ્થ્ય તંત્ર એલર્ટ મોડમાં આવી ગયું છે.
રાજકોટ પોલીસ વડા હિમકરસિંહ પણ પોઝિટિવ
રાજકોટ શહેરમાં પણ સ્થિતિ ચિંતાજનક છે. અહીં આજે 8 નવા કેસ નોંધાયા છે જેમાં 1 મહિલા અને 7 પુરુષોનો સમાવેશ થાય છે. સૌથી મહત્વપૂર્ણ વાત એ છે કે રાજકોટ જિલ્લા પોલીસ વડા હિમકરસિંહ પણ કોરોના પોઝિટિવ આવ્યાં છે. તેમણે પોતાની તબિયત અંગે સ્પષ્ટતા કરતા જણાવ્યું કે તેઓ હાલ હોમ આઇસોલેટ છે અને તબીયત સ્થિર છે.
રાજકોટમાં કુલ કેસ 52, છ દર્દીઓ સાજા પણ થયા
રાજકોટમાં અત્યારસુધીમાં કુલ 52 કેસ નોંધાઈ ચૂક્યા છે, જેમાંથી 12 દર્દીઓ સાજા થયા છે અને હાલ 40 દર્દીઓ હોમ આઇસોલેશન હેઠળ સારવાર લઈ રહ્યા છે. નવા નોંધાયેલા દર્દીઓમાં યુનિવર્સિટી રોડ, રેલનગર, નહેરુનગર જેવા વિસ્તારોમાંથી કેસો સામે આવ્યા છે.
સુરતમાં પણ કોરોનાના 3 કેસ, થાઇલેન્ડથી આવી મહિલા પોઝિટિવ
સુરતમાં તાજેતરમાં નોંધાયેલા 3 નવા કેસમાં એક 84 વર્ષીય વૃદ્ધા, એક થાઇલેન્ડથી પરત આવેલા મહિલા અને એક અમદાવાદથી પરત આવેલો વિદ્યાર્થી છે. ત્રણેય દર્દીઓ હાલ હોમ આઇસોલેટ છે અને તેમની તબિયત સ્થિર છે. સરકારના માર્ગદર્શન મુજબ તેમની જીનોમ સિક્વન્સિંગ માટે નમૂનાઓ ગાંધીનગર મોકલવામાં આવ્યા છે. સુરતમાં અત્યારસુધીમાં કુલ 25 કેસ નોંધાયા છે.
રાજ્યભરમાં વધી રહેલા કેસો વચ્ચે તંત્રના દાવાઓ પર શંકા
ગઈકાલે રાજ્યભરમાં 95 નવા કેસ નોંધાયા હતા અને 2 મોત પણ થયા હતા. જોકે, સરકારના જાહેર આંકડામાં મોતની વિગતો નથી બતાવવામાં આવી. અમદાવાદ મ્યુનિસિપલ કોર્પોરેશને 28 મેના રોજ દાણીલીમડામાં થયેલા એક મોતની માહિતી 2 જૂન સુધી છુપાવી હતી. આ ઘટના તંત્રની પારદર્શિતા પર સવાલ ઊભા કરે છે.
દેશમાં હાલ 4026 એક્ટિવ કેસ, 39 મોત નોંધાયા
અત્યારસુધીમાં દેશમાં કુલ 4026 એક્ટિવ કેસ છે, જેમાંથી 50 ટકા કેસ કેરળ અને મહારાષ્ટ્રમાંથી છે. છેલ્લા ચાર દિવસમાં જ 31 લોકોને કોરોના કારણે જીવ ગુમાવવો પડ્યો છે. ગુજરાતમાં બે મહિલાના મોત નોંધાયા છે.
શાસકપક્ષના નેતાઓના નિવેદનો વિવાદાસ્પદ
જ્યાં એક તરફ કોરોનાના કેસ વધી રહ્યા છે ત્યાં બીજી તરફ આરોગ્ય મંત્રી ઋષિકેશ પટેલે કહ્યું કે, “કોરોના હવે જીવનનો ભાગ છે અને વર્ષે-બે વર્ષે આવો મહિનો આવે છે.” આવા નિવેદનથી તંત્રની ગંભીરતાની કમી સ્પષ્ટ જણાઈ રહી છે.
