Amreli farmers turmeric: ઉત્પાદનમાં ઘટાડો છતાં હળદરના ભાવમાં તેજી, ખેડૂતોને થયો નફો
Amreli farmers turmeric: ચાલતી સિઝનમાં અમરેલી જિલ્લામાં હળદરના ઉત્પાદનમાં આશરે 10%ની ઘટાડો થયો હોવા છતાં, ખેડૂતોના ચહેરા પર ખુશીની ઝલક દેખાઈ રહી છે. કારણ કે ઓર્ગેનિક હળદરની માંગમાં નોંધપાત્ર વધારો થયો છે, જેના કારણે ભાવમાં 30 રૂપિયા જેટલો ઉછાળો જોવા મળ્યો છે. ખેડૂતો પોતાના ખેતરેથી ઉત્પાદન કરીને સીધા ગ્રાહકો સુધી પોહચી રહ્યા છે અને વધુ ભાવ મેળવી રહ્યા છે.
ઓર્ગેનિક હળદર—ગૃહિણીઓની પહેલી પસંદ
હાલમાં શહેર તથા આસપાસના વિસ્તારમાં રહેતી ગૃહિણીઓ ભેળસેળવાળી હળદરને બદલે શુદ્ધ અને ઓર્ગેનિક હળદર ખરીદવાનું પસંદ કરી રહી છે. ખાસ કરીને સેલમ હળદર ની માંગમાં પણ વધારો થયો છે. અમરેલીની રહેવાસી સવિતાબેન પટેલના જણાવ્યા પ્રમાણે, “ગયા વર્ષે હું 200 રૂપિયા પ્રતિ કિલો હળદર લેતી હતી, જ્યારે આ વર્ષે ભાવ 250થી 290 રૂપિયા સુધી પહોંચી ગયો છે. ભલે ભાવ વધ્યા હોય, પણ હું શુદ્ધતાને મહત્વ આપું છું.”
બજારમાં ભાવના નવા ટેંડ
હોલસેલ માર્કેટમાં હળદરના ભાવ હાલમાં 200 થી 300 રૂપિયા પ્રતિ કિલો વચ્ચે ચાલી રહ્યા છે, જ્યારે ઓર્ગેનિક હળદરનો ભાવ 350 રૂપિયા પ્રતિ કિલો સુધી પહોંચ્યો છે. આવી સ્થિતિએ જે ખેડૂતો ઓર્ગેનિક પદ્ધતિથી ખેતી કરી રહ્યા છે, તેઓ વધુ આવક મેળવી રહ્યા છે.
ઉત્પાદનમાં ઘટાડો છતાં લાભ
આ વર્ષે હળદરના ઉત્પાદનમાં વાતાવરણના અનિયમિત બદલાવ અને ઓછા વરસાદના કારણે 10%નો ઘટાડો નોંધાયો છે. છતાં, ખેડૂતો હળદરનું પાવડર બનાવીને અને સીધું વેચાણ કરીને વધારાની કમાણી મેળવી રહ્યા છે. શુદ્ધતા અને ગુણવત્તા સામે ગ્રાહકો પણ વધુ ખર્ચ કરવા તૈયાર છે.
બજારમાં બદલાતી દિશા
આ સીઝનમાં હળદર સાથે મરચું અને ધાણાજીરું પણ માર્કેટમાં વેચાઈ રહ્યું છે, પરંતુ હળદરની માંગ સૌથી વધુ છે. એકંદરે, ઓર્ગેનિક ખેતી અને ઉત્પાદનમાં ગુણવત્તા રાખવાથી ખેડૂતો માટે આ એક નવી તક સાબિત થઈ રહી છે.
આગળનો માર્ગ
હળદરના ઊંચા ભાવ અને ઓર્ગેનિક ઉત્પાદનની વધતી લોકપ્રિયતા ભારતીય કૃષિ ક્ષેત્ર માટે આશાજનક સંકેત છે. જે રીતે ખેડૂતો ઓર્ગેનિક હળદર તરફ વળી રહ્યા છે અને ગ્રાહકો તેની તરફ આકર્ષાઈ રહ્યા છે, તે જોઈને એવું લાગે છે કે આગામી સમયમાં પણ આ ક્ષેત્રમાં નવા દરવાજા ખૂલશે.
