Ahmedabad Plane Crash: અમદાવાદ વિમાન દુર્ઘટના: મૃતક ડોક્ટરો અને સ્ટાફના પરિવારજનો માટે વળતર તથા સ્વતંત્ર તપાસની માંગ સાથે સુપ્રીમ કોર્ટમાં અરજી
Ahmedabad Plane Crash: અમદાવાદમાં 12 જૂનના રોજ થયેલી વિમાન દુર્ઘટના પછી દેશભરમાં શોક અને ગુસ્સાની લાગણી છે. દુર્ઘટનામાં જીવ ગુમાવનાર ડૉક્ટરો, સ્ટાફ અને વિદ્યાર્થીઓના પરિવારજનો માટે ન્યાયની માંગ ઉઠવા લાગી છે. હવે, બે ડૉક્ટરોએ આ મામલે સીધી રીતે ભારતની સુપ્રીમ કોર્ટનો દરવાજો ખખડાવ્યો છે.
સુપ્રીમ કોર્ટમાં અરજી: પીડિત પરિવારજનોને તરત વળતર આપવાની અપીલ
સુપ્રીમ કોર્ટમાં દાખલ અરજીમાં રજૂ કરવામાં આવ્યું છે કે, બીજે મેડિકલ કોલેજના હોસ્ટેલમાં રહેલા જે વિદ્યાર્થીઓ, રેસિડન્ટ ડૉક્ટરો અને સ્ટાફના સભ્યો આ દુર્ઘટનામાં મોતને ભેટ્યા છે, તેમના પરિવારજનોને દરેક માટે રૂ. 50 લાખનું વચગાળાનું વળતર તરત ચૂકવવામાં આવે.
અરજદારોનું કહેવું છે કે આર્થિક રીતે તૂટી પડેલા પરિવારોને ન્યાય આપવો સરકાર અને ન્યાય તંત્રની જવાબદારી છે. નોંધનીય છે કે મૃતકોની સંખ્યામાં ડોક્ટરો અને તબીબી સ્ટાફનો મોટો હિસ્સો સામેલ છે, જે સમાજ માટે અગત્યની સેવા આપતા હતા.
ઊંચી કક્ષાની તપાસ સમિતિની રચનાની પણ માગ
અરજદારો દ્વારા એવું પણ સૂચવવામાં આવ્યું છે કે કેન્દ્ર સરકાર એક ઉચ્ચ સ્તરીય નિષ્ણાત સમિતિની રચના કરે, જેમાં રિટાયર્ડ ન્યાયમૂર્તિ, વિમાનીંગ ક્ષેત્રના તજજ્ઞો, અર્થશાસ્ત્રી અને વીમા નિષ્ણાતોનો સમાવેશ થાય. આ સમિતિ પીડિતોને યોગ્ય વળતર અને સહાય આપવાના માપદંડો નક્કી કરે.
અરજદારોનું માનવું છે કે ‘ત્રિવેણી કોડકની વી.સે. એર ઈન્ડિયા લિમિટેડ’ કેસમાં સુપ્રીમ કોર્ટ દ્વારા રચાયેલ ન્યાયીક સિદ્ધાંતો આ મામલામાં પણ લાગુ પડે.
વળતર મુદ્દે તરત નિર્ણય લેવા દબાણ
આ અરજીમાં એવી પણ દલીલ કરવામાં આવી છે કે વળતર અંગે લાંબી કાયદાકીય પ્રક્રિયાથી પીડિતો દૂર રહે તે જરૂરી છે. જો તરત નક્કી કરવામાં ન આવે તો કુટુંબોને ઘણાં વર્ષો સુધી ન્યાયની રાહ જોવી પડે.
સાથે જ બિલ્ડિંગ અને આસપાસના રહેણાંક વિસ્તારોના જીવ ગુમાવનારોના પરિવારો માટે પુનર્વસન સહાય અને રોજગારીની તકો પણ ઉપલબ્ધ કરાવવાની માંગ કરવામાં આવી છે.
દુર્ઘટનાના કારણ અંગે ઊંડી તપાસની અપેક્ષા
અરજદારો દ્વારા એવો પણ અહેવાલ આપવામાં આવ્યો છે કે દુર્ઘટનાનું કારણ જાણવું અનિવાર્ય છે. સુપ્રીમ કોર્ટ કેન્દ્ર અને DGCAને આ મામલે સંપૂર્ણ અને સચોટ તપાસ કરવા માટે નિર્દેશ આપે. સાથે જ ભવિષ્યમાં આવી ઘટના ફરી ન બને તે માટે નીતિગત પગલાં લેવાનું પણ જણાવવામાં આવ્યું છે.
વિમાન દુર્ઘટનામાં 265 જીવોના ગુમાવાની પીડાદાયક ઘટના
Air India ની ફ્લાઇટ AI-171, જે અમદાવાદથી લંડન જવા માટે રવાના થઇ હતી, ટેક ઑફ થયા માત્ર બે મિનિટ બાદ જ બીજે મેડિકલ કોલેજના હોસ્ટેલ પર ધડાકાભેર આવી અથડાઈ. વિમાનમાં કુલ 241 મુસાફરો હતા અને તેની સાથે જ આશરે 24 સ્થાનિક રહેવાસી પણ દુર્ઘટનાનો ભોગ બન્યા. કુલ મૃત્યુઆંક 265 પર પહોંચી ગયો છે.
આ દુર્ઘટનાથી કેમ્પસ અને આસપાસની અનેક ઈમારતોને પણ ભારે નુકસાન પહોંચ્યું છે.
બ્લેક બોક્સ મળતાં તપાસમાં ટેકો મળશે
વિમાનનું બ્લેક બોક્સ દુર્ઘટનાના બીજા દિવસે કાટમાળમાંથી મળ્યું છે. તેના ડેટાને ડીકોડ કરીને દુર્ઘટનાના મૂળ કારણની જાણકારી મેળવવામાં આવશે. DVR (ડિજિટલ વીડિયો રેકોર્ડર) દ્વારા ઓડિયો-વિડિયો રેકોર્ડિંગની મદદથી વિમાન ક્રેશના સચોટ પળોની માહિતી મળી શકે છે.
આ દુર્ઘટના માત્ર ટેકનિકલ ખામી નહીં પણ માનવ અને તંત્રગત ભૂલનું પણ પરિણામ હોઈ શકે છે. પીડિત પરિવારોને ન્યાય મળે, તાત્કાલિક વળતર મળે અને આવાં દુર્ઘટનાઓના પુનરાવૃત્તિ ન થાય એ માટે કાયદાકીય અને નીતિગત રીતે ઝડપી પગલાં લેવું એ સમયની માંગ છે.
