AAP On Election : ગુજરાત બનશે રાજકીય કુરુક્ષેત્ર! કોંગ્રેસ પછી AAP નેતા આતિશીનું ગુજરાત માટે મોટું એલાન
AAP On Election : ગુજરાત ખરેખર રાજકીય કુરુક્ષેત્ર બની રહ્યું છે. લોકસભામાં વિપક્ષી નેતા રાહુલ ગાંધી ગુજરાતમાં રાજકીય પ્રવૃત્તિઓ તેજ બનાવતા જ આમ આદમી પાર્ટી (AAP)એ મહત્વનું નિવેદન આપ્યું છે. દિલ્હીની પૂર્વ મુખ્યમંત્રી અને AAP નેતા આતિશીએ ગોવામાં પાર્ટી કાર્યાલયના ઉદ્ઘાટન દરમિયાન જાહેરાત કરી કે AAP ગુજરાત અને ગોવામાં વિધાનસભા ચૂંટણી માટે એકલા હાથે મેદાનમાં ઉતરશે.
ગોવા અને ગુજરાતમાં ગઠબંધન વિના ચૂંટણી લડશે AAP
AAPના વરિષ્ઠ નેતા આતિશીએ ગોવામાં પત્રકારોને જણાવ્યું કે તેઓ હજુ સુધી કોઈ ગઠબંધનની ચર્ચા કરી નથી અને પાર્ટી બે રાજ્યોમાં સ્વતંત્રપણે ચૂંટણી લડવાની સંપૂર્ણ તૈયારી કરી રહી છે. 2022ની ગોવા વિધાનસભા ચૂંટણીમાં કોંગ્રેસે 11 બેઠકો જીતી હતી, પરંતુ બાદમાં 8 ધારાસભ્યો ભાજપમાં જોડાઈ ગયા હતા. આતિશીએ આ પરિસ્થિતિ પર કટાક્ષ કરતા કહ્યું કે જ્યારે એક જ પાર્ટીના ધારાસભ્યો મોટી સંખ્યામાં વિપક્ષી શિબિરમાં સામેલ થઈ જાય, ત્યારે સમાન વિચારધારા અંગે ચર્ચાનો કોઈ અર્થ રહેતો નથી.
ગુજરાતમાં AAPની સ્થિતિ અને ચૂંટણી યોજનાઓ
ગુજરાતમાં AAPએ 2022ની વિધાનસભા ચૂંટણીમાં 5 બેઠકો જીતી હતી, હાલમાં 4 ધારાસભ્યો બાકી છે, કારણ કે એક ધારાસભ્ય રાજીનામું આપીને ભાજપમાં જોડાઈ ગયા છે. આતિશીએ જણાવ્યું કે ગુજરાતમાં તેમની પાર્ટી મજબૂતાઈ સાથે કામ કરી રહી છે અને આગામી ચૂંટણીમાં પણ સક્રિય ભૂમિકા ભજવશે.
પીએમ મોદીનો ગઢ અને ત્રિપક્ષીય ટક્કર
ગુજરાત દેશના વડા પ્રધાન નરેન્દ્ર મોદીનું ગૃહરાજ્ય હોવાથી હંમેશા રાજકીય દૃષ્ટિએ હોટસ્પોટ રહે છે. એક તરફ કોંગ્રેસ રાજ્યમાં ફરીથી પાયો મજબૂત કરવાની કોશિશ કરી રહી છે, તો બીજી તરફ AAPએ પોતાનું માળખું ગઠવાનું શરૂ કરી દીધું છે. આ સંજોગોમાં, વિધાનસભા ચૂંટણી નજીક આવતાની સાથે જ રાજ્યમાં ત્રિપક્ષીય ટક્કર જોવા મળશે.
AAP 2027માં પણ ગોવા અને ગુજરાતમાં ગઠબંધન વિના ચૂંટણી લડશે એ વાતને દોહરાવીને પાર્ટીએ સ્પષ્ટ સંકેત આપ્યા છે કે તે આ બે રાજ્યોમાં લાંબા ગાળાની રાજકીય યોજનાઓ સાથે આગળ વધી રહી છે.
