Gujarat Police: ગુજરાત પોલીસ જવાનોની સુરક્ષા પર સંકટ? સર્વેના ચોંકાવનારા ખુલાસાઓ!
Gujarat Police: પોલીસની નોકરી દિવસ-રાત, 24 કલાક ચાલતી હોય છે. સુરક્ષા અને કાયદો-વ્યવસ્થાની જાળવણીમાં વ્યસ્ત રહેતા પોલીસ જવાનો પોતાનાં આરોગ્ય પર પૂરતું ધ્યાન આપી શકતા નથી. નોકરીની આ વ્યસ્તતા અને તણાવભરી પરિસ્થિતિના કારણે ઘણા જવાનો અનેક સ્વાસ્થ્ય સમસ્યાઓનો શિકાર બની રહ્યાં છે. થોડા દિવસ અગાઉ પોલીસ કોન્સ્ટેબલ નરેશ પટણીનું હાર્ટ એટેકથી અવસાન થયું હતું. જેનાથી પોલીસ વિભાગમાં ચિંતાનો માહોલ સર્જાયો છે.
સ્વાસ્થ્ય ચિંતાઓ: 250 માંથી 170 જવાનોમાં કોલેસ્ટ્રોલ અને બ્લડ સુગર વધ્યું
નરેશ પટણીના અચાનક અવસાન બાદ ઉચ્ચ અધિકારીઓએ પોલીસ કર્મચારીઓની આરોગ્ય તપાસના આદેશ આપ્યા હતા. 250 પોલીસ કર્મચારીઓની તપાસ કરવામાં આવી, જેમાં 170 જવાનોમાં કોલેસ્ટ્રોલ અને બ્લડ સુગરનું સ્તર વધેલું જોવા મળ્યું. આ આંકડો ચિંતાજનક છે, કારણ કે અડધાથી વધુ પોલીસ કર્મીઓ હૃદયરોગ અને અન્ય સ્વાસ્થ્ય સંકળાયેલા જોખમો સામે લડાઈ લડી રહ્યા છે.
ફિટનેસ સુધારવા ફરજિયાત ફૂટબોલ મેચોનું આયોજન
પોલીસ કર્મચારીઓ માટે શારીરિક તંદુરસ્તી જાળવી રાખવી મુશ્કેલ બની રહી છે, કારણ કે તેમના કામના કલાકો અનિયમિત હોય છે, આરામનો સમય મર્યાદિત હોય છે, અને અનિયમિત ખોરાકના કારણે તેમનું સ્વાસ્થ્ય વધારે ખરાબ થઈ રહ્યું છે. આ પરિસ્થિતિ સુધારવા માટે ક્રાઈમ બ્રાંચે તમામ કર્મચારીઓ માટે ફરજિયાત ફૂટબોલ મેચોનું આયોજન કરવાનું નક્કી કર્યું છે. ફૂટબોલની પસંદગી એ કારણે કરવામાં આવી, કેમ કે તે સંપૂર્ણ શારીરિક કસરત પૂરી પાડે છે અને કોલેસ્ટ્રોલ તથા બ્લડ સુગરના સ્તરને નિયંત્રિત રાખવામાં મદદરૂપ થાય છે.
પોસ્ટિક ભોજન અને હાઇડ્રેશન માટે ખાસ વ્યવસ્થા
શહેરની ક્રાઈમ બ્રાંચ ઓફિસમાં પોલીસ જવાનો માટે સાત્વિક અને પૌષ્ટિક ભોજન ઉપલબ્ધ કરાવવા માટે વિશેષ વ્યવસ્થા કરવામાં આવી છે. એ સાથે, શહેર પોલીસ વડા ડીજીપી જીએસ મલિકે તમામ પોલીસ જવાનોને નાસ્તો કરીને ડ્યૂટી પર આવવા માટે વિનંતી કરી છે. ગરમીમાં કામ કરતી ટ્રાફિક પોલીસ માટે હાઇડ્રેશનનું મહત્વ સમજતા, NGOs સાથે ભાગીદારી કરીને છાશ વિતરણની વ્યવસ્થા કરવામાં આવી છે.
વિશેષજ્ઞ તબીબોની ચિંતા: તણાવ અને અનિયમિત જીવનશૈલીના કારણે સ્વાસ્થ્ય જોખમ
તબીબોના જણાવ્યા અનુસાર, પોલીસ કર્મચારીઓમાં હાર્ટઅટેક, ડાયાબિટીસ, હાઇપરટેન્શન, અને હૃદયરોગના કેસ વધતા જોવા મળી રહ્યા છે. ધુમ્રપાન અને તમાકુના સેવનથી પણ 20-30% જેટલો વધારાનો જોખમ છે. અનિયમિત ઊંઘ અને સતત તણાવના કારણે, ઘણા પોલીસ જવાનોમાં બિન-ચેપી રોગો (NCDs) પણ વધી રહ્યા છે.
સ્વાસ્થ્ય પ્રત્યે વધુ જાગૃત થવાની જરૂર
રાજ્યમાં કાયદો અને વ્યવસ્થા જાળવી રાખવા માટે સતત કાર્યરત રહેતા પોલીસ જવાનો માટે યોગ્ય આરોગ્ય વ્યવસ્થાઓ, વ્યાયામની તક અને આરોગ્યલક્ષી નીતિઓની તાતી જરૂર છે. પોલીસ તંત્ર અને આરોગ્ય વિભાગ દ્વારા વધુ કડક અને અસરકારક પગલાં ભરવાની જરૂર છે, જેથી પોલીસ જવાનો પોતાનું સ્વાસ્થ્ય જાળવી શકે અને વધુ સારી કામગીરી આપી શકે.
