Visavadar by-election: વિસાવદર પેટાચૂંટણી: અપક્ષ ઉમેદવાર દ્વારા ભાજપના કિરીટ પટેલ પર સોગંદનામા વિવાદ
Visavadar by-election: વિસાવદર વિધાનસભા માટેની પેટાચૂંટણી હવે નવા વળાંક પર પહોંચી છે, જ્યાં અપક્ષ ઉમેદવાર રજનીકાંત વાઘાણીએ સીધા ભાજપના ઉમેદવાર કિરીટ પટેલની ઉમેદવારી પર સવાલ ઊભા કર્યા છે. ઉમેદવારી ફોર્મની ચકાસણી દરમિયાન તેમણે જણાવ્યું કે કિરીટ પટેલે નિયમોનું પાલન ન કરતાં અયોગ્ય રીતે સોગંદનામું રજૂ કર્યું છે.
વાઘાણીએ આક્ષેપ કર્યો કે ભાજપના ઉમેદવારનું શપથનામું એ નમૂનાને અનુસરે છે જ નહીં, જે રાજ્ય સરકારે નક્કી કર્યું છે. તેઓના જણાવ્યા મુજબ, કોઈ વ્યક્તિ પોતાના મર્યાદિત જાણકારીથી શપથનામું તૈયાર કરીને રજૂ કરે, એ ન્યાયસંગત નથી અને તે પ્રકારનું ફોર્મ રદ થવું જોઈએ.
તેમણે આ મુદ્દે ચૂંટણી અધિકારી સમક્ષ લેખિતમાં વાંધો રજૂ કર્યો છે અને જણાવ્યું કે જો અધિકારીઓ નિર્ણય નહીં લે તો તેઓ કાનૂની માર્ગ અપનાવીને હાઈકોર્ટમાં જશે,..
અપક્ષ ઉમેદવારએ એ પણ જણાવ્યું કે કિરીટ પટેલે કેટલાક તથ્યો છુપાવ્યા છે અને કેટલાક ખોટા આંકડા રજૂ કર્યા છે. તે મુજબ, નિયમો બધાં માટે સરખા હોવા જોઈએ અને ભેદભાવ સ્વીકાર્ય નથી.
ચૂંટણી અધિકારી સી.પી. હિરવાણિયાએ સ્પષ્ટ કર્યું છે કે કુલ 31 ઉમેદવારીમાંથી 22 માન્ય માનવામાં આવી છે અને બાકીના ફોર્મ્સ અંગે રજૂ થયેલા વાંધાઓની નિષ્પક્ષ રીતે તપાસ હાથ ધરાશે. તેમણે ઉમેર્યું કે સોગંદનામું અંગેનો મુદ્દો ગંભીર હોવા છતાં તેનું કાયદાકીય મૂલ્યાંકન કર્યા બાદ નિર્ણય લેવાશે.
હવે, જ્યારે મુખ્ય પક્ષો સહિત અપક્ષ ઉમેદવારો પણ મજબૂત રીતે મેદાનમાં છે અને વિવાદો વધી રહ્યાં છે, ત્યારે વિસાવદરની ચૂંટણી આગામી સમયમાં વધુ ગરમ બાબત બની શકે છે.
