Gujarat heatwave alert : “હવે બહાર નીકળતા પહેલા વિચારજો!” ગુજરાતમાં હીટવેવ માટે રેડ અને ઓરેન્જ એલર્ટ
Gujarat heatwave alert : ગુજરાતમાં આગામી દિવસોમાં તાપમાનમાં ભયંકર વધારો થવાની શક્યતા હવામાન વિભાગે વ્યક્ત કરી છે. ખાસ કરીને કચ્છ અને સૌરાષ્ટ્રના વિસ્તારો માટે ગરમીનું જોખમ વધુ હોય તેમ જણાયું છે. તાપમાન 40 ડિગ્રીને પાર પહોંચતાં હીટવેવના રેડ અને ઓરેન્જ એલર્ટ જાહેર કરવામાં આવ્યા છે.
કચ્છમાં બે દિવસ માટે રેડ એલર્ટ
કચ્છ જિલ્લામાં આગામી 6 અને 7 એપ્રિલે હવામાન વિભાગે હીટવેવ માટે રેડ એલર્ટ જાહેર કર્યું છે. રેડ એલર્ટનો અર્થ એ છે કે ખૂબ જ તીવ્ર ગરમી સાથે આરોગ્યને હાનિકારક અસર પહોંચાડતી સ્થિતિ ઊભી થઈ શકે છે.
રાજકોટ-મોરબીમાં ઓરેન્જ એલર્ટ
સૌરાષ્ટ્રના મોરબી અને રાજકોટ જિલ્લામાં હવામાન વિભાગે ઓરેન્જ એલર્ટ આપ્યું છે. હીટવેવની સ્થિતિમાં લોકોના દૈનિક જીવન પર અસર પડે તેવી શક્યતા છે અને ખાસ કરીને બાળકો, વૃદ્ધો અને રોગી લોકો માટે આ અવસ્થા ગંભીર બની શકે છે.
ઉત્તર ગુજરાતમાં યલો એલર્ટ
સાબરકાંઠા, બનાસકાંઠા, પાટણ, મહેસાણા અને ગાંધીનગર સહિતના ઉત્તર ગુજરાતના વિસ્તારોમાં યલો એલર્ટ જારી કરવામાં આવ્યું છે. જો કે આ તીવ્ર હીટવેવ નહીં હોય, તેમ છતાં સામાન્ય લોકો માટે સતર્ક રહેવું જરૂરી છે.
દરિયાકાંઠે પણ તીવ્ર ગરમીની આગાહી
સૌરાષ્ટ્ર-કચ્છ તેમજ દક્ષિણ ગુજરાતના દરિયાકાંઠાના વિસ્તારોમાં પણ તાપમાનમાં વધારો થવાની સંભાવના વ્યક્ત કરવામાં આવી છે. આવી પરિસ્થિતિમાં બહાર નીકળતી વખતે સાવચેતી રાખવી જરૂરી છે.
