Gujarat Education : ધોરણ 10 અને 12 પછી શું કરશો? રોજગાર કચેરીના નિષ્ણાતની મહત્વપૂર્ણ સલાહ
Gujarat Education : ધોરણ 10 અને 12ની બોર્ડ પરીક્ષાઓ પૂરી થઈ ગયા પછી, વિદ્યાર્થીઓ અને વાલીઓ માટે સૌથી મહત્વનો પ્રશ્ન ઉદ્ભવે છે – હવે આગળ શું કરવું? આ પ્રશ્નનો યોગ્ય જવાબ શોધવા માટે યોગ્ય માર્ગદર્શન લેવું જરૂરી છે.
રાજકોટ રોજગાર કચેરીના અધિકારી ચેતન દવેએ વિદ્યાર્થીઓને આ મામલે ઉપયોગી માર્ગદર્શન આપ્યું છે. તેમના જણાવ્યા મુજબ, ધોરણ 10 અને 12 પાસ કરનાર વિદ્યાર્થીઓએ સૌથી પહેલા નેશનલ કરિયર સર્વિસ (NCS) પોર્ટલ પર પોતાનું રજિસ્ટ્રેશન કરાવવું જોઈએ. આ પોર્ટલ ગુજરાત સરકાર દ્વારા સંચાલિત છે અને રોજગાર અને કરિયરને લગતી વિવિધ તકોની માહિતી પૂરી પાડે છે.
વૈકલ્પિક અભ્યાસ અને કારકિર્દી વિકલ્પો
જો વિદ્યાર્થી વધુ અભ્યાસની જગ્યાએ પ્રેક્ટિકલ કુશળતા વિકસાવવા ઈચ્છે, તો તેઓ માટે ITI (ઔદ્યોગિક તાલીમ સંસ્થા) અને MSME (સૂક્ષ્મ, લઘુ અને મધ્યમ ઉદ્યોગ) મંત્રાલય દ્વારા સંચાલિત વિવિધ તાલીમ કેન્દ્રો ઉત્તમ વિકલ્પ બની શકે.
ITI દ્વારા વિવિધ તકનિકી અને વ્યાવસાયિક કોર્સ કરી શકાય છે, જેનાથી કૌશલ્ય સુધારી રોજગાર મેળવવાની તકો વધી શકે. MSME દ્વારા પણ વિવિધ સ્કિલ ડેવલપમેન્ટ પ્રોગ્રામ ઓફર કરવામાં આવે છે, જે ઉદ્યોગોમાં નોકરી મેળવવા માટે ખૂબ જ ઉપયોગી સાબિત થઈ શકે.
ઉદ્યોગોમાં રોજગાર તકો
રાજકોટ અને આસપાસના ઔદ્યોગિક વિસ્તારો જેમ કે શાપર-વેરાવળ અને મેટોડા ખાતે હંમેશા કુશળ કામદારોની માંગ રહે છે. આ કંપનીઓમાં સીધા ઇન્ટરવ્યૂ લઈને લોકોની પસંદગી કરવામાં આવે છે. વિદ્યાર્થીઓ માટે તેમના કૌશલ્યનું પ્રમાણપત્ર અને અનુભવ દર્શાવવું ખૂબ જ મહત્વનું બની જાય છે.
માહિતી ખાતાનો વિશેષ અંક
દર વર્ષે, માહિતી ખાતા દ્વારા ધોરણ 10 અને 12 પછીના વિવિધ વિકલ્પોને લઈને એક વિશેષ અંક પ્રકાશિત કરવામાં આવે છે. આ અંકમાં કોલેજો, વ્યાવસાયિક, તાલીમ કાર્યક્રમો અને રોજગાર તકોની માહિતી આપવામાં આવે છે. વિદ્યાર્થીઓએ આ અંક વાંચવો જોઈએ જેથી તેઓ યોગ્ય નિર્ણય લઈ શકે.
કરિયર કાઉન્સેલિંગ સેવા
જેમને કરિયરની પસંદગી અંગે વધુ માર્ગદર્શન જોઈએ, તેઓ રાજકોટ રોજગાર કચેરીની કરિયર કાઉન્સેલિંગ સેવાનો લાભ લઈ શકે. અહીં વિદ્યાર્થીઓને રિઝ્યુમે કેવી રીતે બનાવવો, આગળના અભ્યાસ માટેના વિકલ્પો, અને વિવિધ નોકરીઓ વિશેની માહિતી પૂરી પાડવામાં આવે છે.
વિદેશમાં રોજગારની તક
વિદેશમાં રોજગાર મેળવવા ઈચ્છતા વિદ્યાર્થીઓ માટે રાજકોટમાં ખાસ કેન્દ્ર છે, જ્યાં વિદેશ જવા માટેની પ્રક્રિયા, પાસપોર્ટની તૈયારી અને રોજગારીની તકો વિશે માર્ગદર્શન આપવામાં આવે છે. ચેતન દવેના જણાવ્યા અનુસાર, વિદેશમાં કામ મેળવવા માટે યોગ્ય દસ્તાવેજો અને કૌશલ્ય જરૂરી છે.
તકનીકી કૌશલ્ય સાથે ભવિષ્ય સુનિશ્ચિત કરો
ધોરણ 10 અને 12 પછી શિક્ષણ અને કારકિર્દી માટે અનેક વિકલ્પો ઉપલબ્ધ છે. સાચા માર્ગદર્શન અને યોગ્ય તૈયારી દ્વારા, વિદ્યાર્થીઓ તેમના રસ અને ક્ષમતાને અનુરૂપ શ્રેષ્ઠ કારકિર્દી વિકલ્પ પસંદ કરી શકે. યુવાનો માટે મહત્વનું છે કે તેઓ ગૂંચવણમાં ન પડતા, સચોટ માહિતીના આધારે સંયમપૂર્વક આગળ વધે.
